Gipuzkoako Herriarteko Pilota Txapelketaren aurtengo ekinaldia lehen kanporaketa osatzeko bidean da, asteburu honetan. Azken urteotan ohikoa den bezala, hiru ataletan banatuko dute lehiaketa: esku huska, pala eta zesta. Goierrik eskuz eta palaz izango ditu ordezkariak, denera bost herritakoak. Palako modalitatean partaidetza oparoagoa izango da, tradizioz eskuak izan duen indarrak behera egin ondoren. Zestan ez da [...]

Beti Gazte jubilatu elkarteak urtearen hasieran sortu zuen kantuzale taldeak astelehenero egiten ditu saioak, kultur etxe zaharrean, 18:30etik aurrera. Ekimena herrira zabaltzeko asmoan, abesteko gogoa duten zaldibiar guztiei egin diete joateko gonbita. Lagun arteko kantuzale kuadrilla kalera ere irtengo da noizean behin.

Lazkaoko Udalak herritarrekin auzoka bilerak egiteko ekimenean, bigarren saioa asteazkenean izango da, maiatzak 23. Lehendik iragarritako lekua aldatu egingo dute, ordea. Areria zineman izango da batzarra, 19:00etan, Hirigoiengo eskola zaharrean izan ordez. Zubizkitza, Hirigoien, Gurutze eta Zelata auzoetako herritarrentzat da bilkura hori, iritziak, kezkak, iradokizunak edo galderak udalkideei zuzenean esateko.

Datorren astean hasi eta maiatza amaiera arte, Urretxuko eta Zumarragako Sekundino Esnaola musika eskolako ikasleek hiru kontzertu eskainiko dituzte asteko. Horietako bat, hilaren 26koa, kalean izango da. Ikasturte amaiera gertu dagoenean biderkatu egingo dituzte emanaldiak. Datorren asteartean, Zumarragako Legazpi dorretxean, biolin ikasleek joko dute. Asteazkenean trikiti ikasleen emanaldia izango da eta oboe ikasleena datorren ostiralean.