Anoetaldeko Hitza

Sendabelarretarako ikastaroa, ostegunetan

Tolosaldeko eta Leitzaldeko Hitza — Wed, 15 Feb 2012 06:43:17 +0000

Udalak sendabelarren ikastaroa antolatu du otsailaren 23tik martxoaren 29ra. Amaia Bastarrika izango da irakaslea, eta ikastaroak ostegunetan izango dira, 17:00etatik 19:00etara. Guztira sei klase emango ditu Bastarrikak. Izena emateko azken eguna hilaren 17a, etzi, izango da. Goizez udaletxera joan beharko da, eta arratsaldez liburutegira edo kiroldegira. Matrikula egin nahi duenak 50 euro ordaindu beharko ditu. Murrizpenak ere egongo dira: familia ugaria, langabetua, ikaslea, pentsioduna edo 60 urtetik gorakoek %25 gutxiago ordaindu beharko dute, eta gazte txartelarekin %10 jaitsiko da matrikulazioa.

Guardia Zibila Gaztetxearen atarian

Tolosaldeko eta Leitzaldeko Hitza — Tue, 14 Feb 2012 14:30:32 +0000

Gazte Asanbladatik azaldu dutenez, aurreko asteartean, otsailaren 7an, Guardia Zibilaren hiru auto (guztira 12 bat Guardia Zibil) joan ziren Anoetako Gaztetxe atarira. Bertan 30 minutu inguru egon zirela azaldu dute, Gaztetxera zein alboko musika lokaletara zihoazenei identifikazioa eskatuz, eta motxilak eta kotxeak miatuz. Horrez gain, Gaztetxe ingurua eta terraza arakatzen aritu zirela esan dute; «guztia inolako azalpenik eman gabe». Gazte Asanbladako kideek gertaera salatu nahi izan dute, «probokazio eta eraso bat dela uste dugulako; horrelako ekintzekin gazteak beldurtzea lortu nahi badute, jakin dezatela gurekin jai dutela, eta tinko jarraituko dugula gure helburuak lortzeko bidean».

Dantza Soka Eguna ospatzen ari dira Anoetan

Anoetaldeko Hitza — Sat, 11 Feb 2012 17:09:53 +0000

Goizean goiz hasi dute eguna dantzariek. Baserrietara musika eta dantza eraman dituzte, eta ondoren, plazan elkartu dira guztiak. Plaza dantzariz bete dute, eta ikusten zeuden hainbat mutil ere, plaza jaitsi dituzte beraiekin dantza egiteko.

Bazkariaren ostean, poteoa egingo dute herriko trikitilariekin. Musika, dantza eta talorik ez da faltako. Itzel taldea izango da 19:00etatik aurrera.

Sokaren bueltan dantzan ospatuko dute eguna, bihar

Anoetaldeko Hitza — Fri, 10 Feb 2012 06:45:58 +0000

Bihar, hilak 11, Dantza-soka eguna ospatuko dute, Anoetan. Urtero bezala, kaldereroetan ospatzen dute herriko jai hau. Hogeita hamar urtez galdutako festa hau, 2003. urtean berreskuratu zuten, eta harrez gero urtero ospatzen dute. Iaz lehen aldiz, dantza goizez bakarrik egitea erabaki zuten, eta aurten ere horrela egingo dute.

Iazko Dantza-soka eguneko irudia

Egunari hasiera goizean goiz emango diote. 08:30ean dute hitzordua, eta guztiak herriko plazan elkartu ostean, baserriz baserri ibiliko dira dantza, musika eta umore ona zabalduaz. Behin landa gunea pasa ondoren, 12:30ean, berriz, herriko plazan elkartuko dira. Baserriz baserri ibilitako taldeaz gain, herritarrez beteko da plaza. Txistu doinuei jarraituz, sokaren bueltan egingo dute dantza. Aurten, herriko neskak izango dira protagonista, eta beraiek dantzatuko dute.
Behin dantza saioa bukatuta, eta ohiturari jarraituz 14:00etan, babarrun jatea egingo dute Kuku elkartean. Behin tripa bapo bete eta indarrak hartuta, kalejirari ekingo diote, poteoan ibiltzeko. Horretarako, herriko trikitilariak izango dituzte lagun.
Ondoren, Anoetako dantza taldeko gaztetxoen txanda izango da. Beraien emanaldia eskainiko dute, plazan. 19:00etan, erromeria izango da Itzel taldearekin. Antolatzaileek jakinarazi dute, taloak egongo dira hurbiltzen diren guztientzat.
Iaz euripean busti-busti eginda egin behar izan zuten dantza, ea aurtengoan euriak festa ez duen zapuzten. Eguraldi hotzak jarraitzen badu ere, txistuaren erritmora dantza eginez tenperatura baxuei aurre egingo diote anoetarrek.

Dantza-soka eguna

Hilak 11, bihar
08:30. Plazan elkartuko dira baserrietara joateko.
12:30. Plazan egingo dute dantza. Aurten nesken txanda izango da.
14:00. Babarrun jatea egingo dute, Kuku elkartean.
18:00. Kalejira eta poteoa egingo dituzte herriko trikitilariekin.
Ondoren. Anoetako dantza taldeko gaztetxoek, beraien emanaldia eskainiko dute, herriko plazan.
19:00. Erromeria Itzel taldearekin izango da.
Oharra. Aurten ere, taloak egongo dira gerturatzen diren guztientzat.

Anoetan Dantza-soka eguna ospatuko dute, larunbatean

Anoetaldeko Hitza — Thu, 09 Feb 2012 12:20:01 +0000

Larunbatean, hilak 11, Dantza-soka eguna ospatuko dute, Anoetan. Urtero bezala, kaldereroetan ospatzen dute herriko jai hau. Hogeita hamar urtez galduta egon zen festa hau, 2003. urtean berreskuratu zuten. Iaz lehen aldiz, dantza goizez bakarrik egitea erabaki zuten, eta aurten ere horrela egingo dute.
Egunari hasiera goizean goiz emango diote. 08:30ean dute hitzordua, eta guztiak herriko plazan elkartu ostean, baserriz baserri ibiliko dira. 12:30ean, berriz, herriko plazan elkartuko dira. Aurten nesken txanda izango da, eta txistu doinuei jarraituz, sokaren bueltan dantzan ibiliko dira. Bazkariaren ostean, arratsaldean ere ez da girorik eta festarako gogorik faltako Anoetan.

Dantza-soka eguna

Hilak 11, larunbata
08:30. Plazan elkartuko dira baserrietara joateko.
12:30. Plazan egingo dute dantza. Aurten nesken txanda izango da.
14:00. Babarrun jatea egingo dute, Kuku elkartean.
18:00. Kalejira eta poteoa egingo dituzte herriko trikitilariekin.
Ondoren. Anoetako dantza taldeko gaztetxoek, beraien emanaldia eskainiko dute, herriko plazan.
19:00. Erromeria Itzel taldearekin izango da.
Oharra. Aurten ere, taloak egongo dira gerturatzen diren guztientzat.

Anoetarrek Santa Ageda bezperan biltzen duten dirua Lodosako ikastolara bidaliko dute

Anoetaldeko Hitza — Fri, 03 Feb 2012 14:12:34 +0000

Anoetar talde batek usadio zaharrei eutsi asmoz, Santa Ageda bezperan kantuan aterako dira, beti ere, eguraldiak laguntzen badu. Jasotzen duten dirua Lodosako ikastolara bidaliko dute. “Herritar guztiei dei egiten diegu gurekin batera etor daitezen”, esan dute.

Kaldereroetarako entsegua hilaren 7an

Tolosaldeko eta Leitzaldeko Hitza — Fri, 03 Feb 2012 07:05:44 +0000

Kaldereroak otsailaren 10ean, ostiralean, ospatuko dituzte Iruran. Loatzo musika eskola eta udala ari dira prestaketa lanetan, eta aurrez entsegu bat egiteko asmoa agertu dute. Musika eskola bertan gelditu dira hilaren 7rako, astearterako. 18:00etan hasiko dira entseguarekin, eta herritarrei zartagina eta mailua eramateko eskatu diete.

«Ez lanik eta ezta kalte-ordainik»

Tolosaldeko eta Leitzaldeko Hitza — Thu, 02 Feb 2012 06:07:49 +0000

Irurako Emusiko langileek enpresako arduradunekin eta Talleres Arrospideko ordezkariekin bilera bat egin nahi dute. Lantegia itxi ondoren, kale gorrian aurkitzen dira. Emusiko langileek hiru galdera dituzte egiteko, eta hauen erantzuna jakin nahi dute: «Zer gertatu da 40 lanposturekin? Zer gertatu da adostutako kalte-ordainekin? Eta zergatik sentitzen gara engainaturik?».
Langileek, makina eta ekipo mekanikoak eraikitzen zituzten Iruran. Lan hori egiteko aukera guztiak amaitu zirenean, enpresa aurrean elkartzen hasi ziren astero: astelehenetan, asteazkenetan eta ostiraletan, 2011ko azaroaren 28az gaurdaino. Emusi zenaren aurrean, elkarretaratzea egiten dute, lanik eta «adostutako» kalte-ordainik gabe utzi dituztela salatzeko.
Kartelak, esku-orriak, prentsa… Bizi duten egoera salatzeko eta gizarteratzeko erabakia hartu dute.
«Erantzunaren zain»
Kapitalismoaren krisia agerian gelditzen hasi zenean, Emusin lan erregulazio espedienteekin hasi ziren. Langileen esanetan, «gero, soldatak atzeratzen hasi ziren, eta 2010eko irailean, konkurtsoan sartu zen enpresa, hau da, hartzekodunen konkurtsoan».
Maldan beherako bide hau, duela bi urte egonkortu zen, beti ere okerrenean; honela kontatzen dute Emusiko langileek: «Hainbat hilabete lan erregulazioan egon ondoren, aktibitatea jarraitzea ezinezkoa bihurtu zen. Konkurtsoaren administratzaileek langile guztien lan kontratuak etetea erabaki zuten, eta lantegia likidazioan sartu zen 2011ko martxoan».
Une horretan, langileek dena beltz ikusten zuten, eta eskaintza onartzea erabaki zuten: «Irtenbiderik ez genuen ikusten, eta urteko 30 eguneko kalte-ordaina adostu genuen enpresa zuzentzen ari ziren administratzaileekin. Hauek, aldi berean, Emusi erosteko eskaintzaren bat izan ezkero, langileen ordezkariei informazioa emateko konpromisoa hartu zuten».
Tarte horretan, Talleres Arrospide lantegiko nagusiek eskaintza bat egin zutela diote langileek: «Emusi erosteko zazpi milioi euro jartzeko prest agertu ziren. Diru horrekin, gure kalte-ordainak eta hartzekodunen zor guztia ordaintzen zenez, langileok eskaintza onartzea erabaki genuen». Talleres Arrospidetik, ordea, baldintza bat jarri zutela diote: «Egin beharreko paperak egin bitartean, lanean hastea nahi zuten, bezeroak ez galtzeko helburuarekin».
Hau ez zitzaion gustatu Gizarte Segurantzari: «Enpresa jarraikortasun egoera batean egon zitekeela mehatxatu zuen, eta Talleres Arrospide atzera bota zen», diote langileek.
Emusi likidazioan sartu zenean, Talleres Arrospide berriro agertu zen. Kasu honetan, bere eskaintza «4,3 milioi eurokoa» izan zen. Langileek azaldu dutenez, 40 lanpostu berri sortzeko proiektua aurreikusten zuen eskaintza horrek: «Administratzaileek onartzea erabaki zuten, nahiz eta jakin adostutako kalte-ordainak ordaintzeko nahikoa diru ez zela. Hori dena gertatzen ari zen bitartean, langileok aurrez jakin bagenekien bezala, Euskal Forginek Emusiren pabilioi erdia erosi zuen».
Anoetako Talleres Arrospide eta konkurtsoko administratzaileen akordioak, lanik eta kalte-ordainik gabe utzi dituztela salatzen dute Emusiko langileek: «Fogasatik, Soldatak Bermatzeko Funtsatik, urteko hogei egun jaso ditugu, hau da, adostutakoaren %40a bakarrik».
Egoera honen aurrean Emusiko langileek ondorengo galderak egiten dituzte: «Konkurtsoaren administratzaileek zergatik onartu zuten eskaintza hura, ez bazituen langileon kalte-ordainak estaltzen? Talleres Arrospidek zergatik egin zuen hain eskaintza baxua administratzaileekin genuen akordioaren berri bazutenean? Non daude sortu behar ziren 40 lanpostuak?».
Galdera hauen erantzuna jasotzeko, Irurako lantegiko langileek bilera bat egin nahi dute administratzaileekin eta Talleres Arrospideko ordezkariekin. Hasiera batean, konkurtsoko administratzaileekin elkartzekoak ziren, baina langileen esanetan, atzera bota ziren: «Euren aholkulariekin hitz egin ondoren, gurekin inongo zorrik ez zutela esan ziguten, eta bilera ez egitea erabaki zuten».
Emusin 65 langilek egiten zuten lan. Lanik gabe jarraitzen dutenei, aurtengo irailean amaituko zaie langabezia saria. Izugarrizko ezintasuna dutela diote, «adostutako kalte-ordainik eta lanposturik gabe gelditu garelako».

Dantza-Soka egunerako entsegu orokorrak deitu dituzte

Anoetaldeko Hitza — Thu, 02 Feb 2012 04:10:56 +0000

Dantza-Soka Eguna hilaren 11ean ospatuko dute, Anoetan. Entsegu orokorrak egiten ari dira, eta bihar, 19:30ean, eta asteazkenean, hilak 8, 19:00etan frontoian izango dira. Garrantzitsua dela entsegu orokorretan parte hartzea, eta Dantza-Sokan parte hartu nahi dutenei dei egiten zaie bertara joateko.

Parte hartzeko zerrendak Itzuli tabernan daude jarrita, eta apuntatzeko epea hilaren 5a arte da.

Emusiko langileak kalean protestan

Tolosaldeko eta Leitzaldeko Hitza — Wed, 01 Feb 2012 09:23:06 +0000