Anoetaldeko Hitza » Irura

Kaldereroetarako entsegua hilaren 7an

Tolosaldeko eta Leitzaldeko Hitza — Fri, 03 Feb 2012 07:05:44 +0000

Kaldereroak otsailaren 10ean, ostiralean, ospatuko dituzte Iruran. Loatzo musika eskola eta udala ari dira prestaketa lanetan, eta aurrez entsegu bat egiteko asmoa agertu dute. Musika eskola bertan gelditu dira hilaren 7rako, astearterako. 18:00etan hasiko dira entseguarekin, eta herritarrei zartagina eta mailua eramateko eskatu diete.

«Ez lanik eta ezta kalte-ordainik»

Tolosaldeko eta Leitzaldeko Hitza — Thu, 02 Feb 2012 06:07:49 +0000

Irurako Emusiko langileek enpresako arduradunekin eta Talleres Arrospideko ordezkariekin bilera bat egin nahi dute. Lantegia itxi ondoren, kale gorrian aurkitzen dira. Emusiko langileek hiru galdera dituzte egiteko, eta hauen erantzuna jakin nahi dute: «Zer gertatu da 40 lanposturekin? Zer gertatu da adostutako kalte-ordainekin? Eta zergatik sentitzen gara engainaturik?».
Langileek, makina eta ekipo mekanikoak eraikitzen zituzten Iruran. Lan hori egiteko aukera guztiak amaitu zirenean, enpresa aurrean elkartzen hasi ziren astero: astelehenetan, asteazkenetan eta ostiraletan, 2011ko azaroaren 28az gaurdaino. Emusi zenaren aurrean, elkarretaratzea egiten dute, lanik eta «adostutako» kalte-ordainik gabe utzi dituztela salatzeko.
Kartelak, esku-orriak, prentsa… Bizi duten egoera salatzeko eta gizarteratzeko erabakia hartu dute.
«Erantzunaren zain»
Kapitalismoaren krisia agerian gelditzen hasi zenean, Emusin lan erregulazio espedienteekin hasi ziren. Langileen esanetan, «gero, soldatak atzeratzen hasi ziren, eta 2010eko irailean, konkurtsoan sartu zen enpresa, hau da, hartzekodunen konkurtsoan».
Maldan beherako bide hau, duela bi urte egonkortu zen, beti ere okerrenean; honela kontatzen dute Emusiko langileek: «Hainbat hilabete lan erregulazioan egon ondoren, aktibitatea jarraitzea ezinezkoa bihurtu zen. Konkurtsoaren administratzaileek langile guztien lan kontratuak etetea erabaki zuten, eta lantegia likidazioan sartu zen 2011ko martxoan».
Une horretan, langileek dena beltz ikusten zuten, eta eskaintza onartzea erabaki zuten: «Irtenbiderik ez genuen ikusten, eta urteko 30 eguneko kalte-ordaina adostu genuen enpresa zuzentzen ari ziren administratzaileekin. Hauek, aldi berean, Emusi erosteko eskaintzaren bat izan ezkero, langileen ordezkariei informazioa emateko konpromisoa hartu zuten».
Tarte horretan, Talleres Arrospide lantegiko nagusiek eskaintza bat egin zutela diote langileek: «Emusi erosteko zazpi milioi euro jartzeko prest agertu ziren. Diru horrekin, gure kalte-ordainak eta hartzekodunen zor guztia ordaintzen zenez, langileok eskaintza onartzea erabaki genuen». Talleres Arrospidetik, ordea, baldintza bat jarri zutela diote: «Egin beharreko paperak egin bitartean, lanean hastea nahi zuten, bezeroak ez galtzeko helburuarekin».
Hau ez zitzaion gustatu Gizarte Segurantzari: «Enpresa jarraikortasun egoera batean egon zitekeela mehatxatu zuen, eta Talleres Arrospide atzera bota zen», diote langileek.
Emusi likidazioan sartu zenean, Talleres Arrospide berriro agertu zen. Kasu honetan, bere eskaintza «4,3 milioi eurokoa» izan zen. Langileek azaldu dutenez, 40 lanpostu berri sortzeko proiektua aurreikusten zuen eskaintza horrek: «Administratzaileek onartzea erabaki zuten, nahiz eta jakin adostutako kalte-ordainak ordaintzeko nahikoa diru ez zela. Hori dena gertatzen ari zen bitartean, langileok aurrez jakin bagenekien bezala, Euskal Forginek Emusiren pabilioi erdia erosi zuen».
Anoetako Talleres Arrospide eta konkurtsoko administratzaileen akordioak, lanik eta kalte-ordainik gabe utzi dituztela salatzen dute Emusiko langileek: «Fogasatik, Soldatak Bermatzeko Funtsatik, urteko hogei egun jaso ditugu, hau da, adostutakoaren %40a bakarrik».
Egoera honen aurrean Emusiko langileek ondorengo galderak egiten dituzte: «Konkurtsoaren administratzaileek zergatik onartu zuten eskaintza hura, ez bazituen langileon kalte-ordainak estaltzen? Talleres Arrospidek zergatik egin zuen hain eskaintza baxua administratzaileekin genuen akordioaren berri bazutenean? Non daude sortu behar ziren 40 lanpostuak?».
Galdera hauen erantzuna jasotzeko, Irurako lantegiko langileek bilera bat egin nahi dute administratzaileekin eta Talleres Arrospideko ordezkariekin. Hasiera batean, konkurtsoko administratzaileekin elkartzekoak ziren, baina langileen esanetan, atzera bota ziren: «Euren aholkulariekin hitz egin ondoren, gurekin inongo zorrik ez zutela esan ziguten, eta bilera ez egitea erabaki zuten».
Emusin 65 langilek egiten zuten lan. Lanik gabe jarraitzen dutenei, aurtengo irailean amaituko zaie langabezia saria. Izugarrizko ezintasuna dutela diote, «adostutako kalte-ordainik eta lanposturik gabe gelditu garelako».

Emusiko langileak kalean protestan

Tolosaldeko eta Leitzaldeko Hitza — Wed, 01 Feb 2012 09:23:06 +0000

Lehen aldiz egin dute azken ostiraletako elkarretaratzea

Anoetaldeko Hitza — Mon, 28 Nov 2011 11:52:30 +0000

Ostiralean, Iruran lehendabiziko aldiz euskal preso politikoen Euskal Herriratzearen aldeko kontzentrazioa egin zuten.

“Oso arrakastatsua” izan zela argitu dute. Bertan, “60 heldutik gora” elkartu ziren Egin dezagun bidea, euskal presoak Euskal Herrira lelopean. Irurak bere bideari ekin diola, eta errealitate bihurtu bitartean hileroko azken ostiraletan kontzentratuko direla adierazi dute.

“Bidea gurekin batera egitea aukeratu dutenei eskerrak eman dizkiegu eta datozenetan parte hartzera gonbidatzen ditugu irurar guztiak” azpimarratu dute.

Festekin «oso pozik» gelditu da jai batzordea

Tolosaldeko eta Leitzaldeko Hitza — Wed, 12 Oct 2011 06:46:17 +0000

Irurako jai batzordea «oso pozik» aurkitzen da igaro berri diren San Migelak 2011 herriko jaiekin. Horregatik, herritar eta bisitari guztiei adierazi nahi izan die poztasun hori. Gainera, jai batzordeak eskerrak eman nahi izan dizkie herriko jaietako ekintzak antolatzen lagundu duten guztiei, eta bereziki, ondorengoei: «Tolosako Arraun Elkarteari, Irurako Ikastolari, Gazte Alaiak eta Share Elkarteei, Loatzo Musika Eskolari eta herriko tabernariei».
Azkenik, jaietako balorazioa egiteko bilera hilaren 13an, bihar, egingo dutela azaldu dute. Herritar guztiak gonbidatu dituzte bertara. Batzarra udaletxean egingo dute, 19:30etik aurrera.

Euskara ikastaroak antolatu ditu Irurako udaletxeak

Tolosaldeko eta Leitzaldeko Hitza — Wed, 12 Oct 2011 04:45:35 +0000

Euskara ikasi edo hobetu nahi duten helduek Iruran horretarako aukera izango dute, euskara ikastaroak antolatu baitituzte. Matrikula egin nahi dutenek udaletxera joan beharko dute, edo-ta 943 69 13 33 telefonora deitu. Izena emateko azken eguna hilaren 14, etzi, da.
Diru laguntzak
Anoetako Udalak bezala, Irurakoak ere diru laguntzak emango dizkie euskara ikastaroetan izena ematen dutenei. Diru laguntzen inguruan informazio gehiago nahi duenak, Anoeta eta Irurako udaletxeetara joan beharko du, aurkeztu behar diren dokumentuen berri jakiteko.

«Emakumearen ikuspegiak alor guztietan lekua izan behar du»

eneritz maiz — Wed, 05 Oct 2011 22:02:18 +0000

Irurako Udalak berdintasun diagnostikoa egiteko asmoa du. Hitzak Noelia Lataburu (1982, Tolosa) Berdintasun zinegotzia elkarrizketatu du. Udalera sartzerako oso garbi zuen berdintasunaren gaiari gogor heldu nahi ziola.

Berdintasun zinegotzia zara. Udalean alor hau jorratzea beharrezko ikusi duzue.
Udaletxera sartu, eta segituan erabaki genituen zeintzuk izango ziren gure ildoak. Ildo horien artean parte hartzea, kirola, kultura,… daude, baina oso argi ikusten genuen emakumearenak ere egon behar zuela. Askotan baten edo biren borroka izaten da, eta Bilduk garbi du gai honi heldu behar zaiola. Batzordea osatu dugu, eta ni izango naiz batzorde buru. Gorka Muruak, Ainara Mujikak eta nik osatzen dugu batzordea. Gure teknikaria, berriz, gizarte zerbitzuetako langilea da.
Teknikaria faltako litzaizueke orduan.
Niretzat ideala teknikaria izatea izango litzateke, baina krisi garaian gaude, eta gaia hor dago ezinean. Agian, herri txikiekin elkartu eta teknikari bat elkar banatu edo aztertu egin beharko genuke. Gaur gaurkoz, gizarte zerbitzuetako langilea dugu. Gaiarekin oso sentsibilizatua dago, eta lanerako erraztasunak ematen dizkigu.
Bigarren maila bateko gaia izan ohi da berdintasunarena askotan.
Berdintasunaren gaiarekin sarritan gertatzen da baietz esan, baina egunerokoan albo batera uzten dela. Kanpo lana egin behar da, baina barne lan batetik hasita. Hau da, guk kontzientziatu behar dugu lehenengo. Guk esaten dudanean, hautetsiak esan nahi dut, eta langileak. Sail bat osatu dugu, baina berdintasuna zeharkako gaia da, dena ukitzen du. Baina batzuetan berdintasuna esan, eta tratu txarrak jasaten dituzten emakumeak etortzen zaizkigu burura, eta ez, berdintasunak guztian eragiten du. Berdintasunaren ikuspegia udalak antolatzen dituen ekitaldi eta lan guztietan txertatzea da. Orain arte egon ez dena edo landu ez dena da. Izan ere, jendarte batean bizi gara non berdintasuna dagoela esaten da, baina errealitateak aurkakoa erakusten digu.
Tradizioak eragin handia du oraindik.
Bai, gauza pila bat daude. Pixkana-pixkana ea aldatzen dugun, eta lehenengo gauza gu gara. Talde barruan landu egin nahi dugu, eta sentsibilizaziorako egon daitezken ikastaroak egin. Askotan gertuko edo inguruko jendearekin gertatzen zaigu; emakumearen gaia aipatu, eta ‘orain ere kontu berarekin’ esanez bukatzen dutenak izatea. Guztiok egin behar dugu lana. Niretzat oso garrantzitsua da kanpora begira lanean hasi aurretik, barruan kontzientzia hori piztea.
Udal langileek ere zer esana izango dute.
Bai, politikoekin batera udaletxeko gaiak beraiek mugitzen dituzte. Langile batzuk oso sentsibilizatuta egon daitezke, baina beste alor batzuetakoek ez dute kontuan hartzen. Transbertsalitatea ulertaraztea zaila da. Kontzientzia piztea da kontua.

Zertan, esaterako?
Udal batek datuen segrazioa egiten duen edo ez oso adierazkorra da. Dena batera egiten bada, ezin duzu emakumearen egoeraren perspektibarik jaso. Adibidez, 100 lagunek eskatu dute laguntza, baina horietatik zenbat dira emakumeak? %90a emakumezkoa bada, udalarentzat datu hori adierazkorra da. Eta zerbaitetan eragin beharko da.

Herri txikia izatearekin zailtasunak ere gehiago izango dituzue ezta?
Tolosa batek izugarrizko martxa du. Herri handi bat da, berdintasun saila du aspalditik eta teknikaria dauka. Gu herri txiki bat gara, eta ezaugarri ezberdinak ditugu, baina informatzen ibili gara, eta adibidez Itsasondon egin zen, eta herri txikietan ere landu izan da.
Herriko jaiak pasa berri dituzue, eta txupinazoan emakumea izan zen protagonista. Dagoeneko hasi zarete herrian gaia jorratzen?
Bai, jaietan ere gaia herritarrengana iristeko sartzen saiatu gara. Emakumeak bota zuen txupinazoa, eta danborradan puntu moreak banatu genituen. Askok zer zen galdetzen zuten. Jendeak ez dakiela iruditzen zait, ‘Berdintasuna? Baina zertarako?’ esaten dizute. Gure lana, barne eta kanpo lanketa bidez, jendea sentsibilizatzea izango da. Emakumeak hor egon behar du, emakumearen ikuspegia beharrezkoa da erabakiak hartzeko, gauzak antolatzeko,… guztirako. Bestela, mundu honek orain bezala jarraituko du gizonen ikuspegitik, erabakiak beraiek hartuko dituzte,…
Nola ikusten duzu gaur egungo gizartea?
Oro har eta ez Iruran bakarrik, oraindik gauza pila bat dagoela egiteko uste dut. Beldur handiagoa ematen du gazteengan ikusten duzunean. Aitona baten ahotik entzuten baduzu, azkenean jaso duten hezkuntza dela eta, uler dezakezu. Beste garai batzuk bizitu dituzte, baina beraiekin ere gauza pila bat landu daitezke. Beraientzat emakumea etxekoandrea zen, baina gazteetan beldurra ematen du.
Nolako etorkizuna dugu gazteei begiratuta?
Datuak ikusita, beldurgarria da. Gaur egungo gazteek eskoletan gaia lantzen dute, baina gero kalean atzeraka goaz. Teoria badakite, baina praktikara eramanda hori ez da betetzen. Nahigabe umeekin ere erori egiten gara, eta ezberdin tratatzen ditugu. Adibidez, jostailu bat erostera joaten gara umearentzat, eta neska ala mutila den galdetzen dizute, eta ume bat da. Banaketa oso barneratua dugu.
Eskolako heziketa gauza bat da, baina etxean ikusitakoak zer esan handia du ezta?
Gazteek eskolan lantzen dute gaia, baina zer ikusten dute etxean? Berdintasuna ‘bai bai’ esan, baina bizitza errealean ez baduzu jorratzen alferrik da. 30 urtera bitartekoekin lan pila bat dugu egiteko. Oso barneratuta ditugu estereotipo guztiak. Eta gure adinekoei ere, gurasoek transmititu dizkigute. Ez intentzio txarrarekin, hori da beraiek ikasi dutena, baina apurtzen duen belaunaldi bat egon behar da. Horretarako landu egin behar da.
Herrian diagnostikoa egingo duzue. Zein dira lau urteetarako helburuak?
Azaroak 25 eta martxoak 8 egunetatik ateratzea nahi genuke. Horiek ondo daude baina ezin zara horretara mugatu. Urte guztira zabaldu behar dugu. Lau urte nahi gabe pasako dira, eta ezin gara helburu handiak jartzen hasi. Poliki-poliki joan behar dugu, eta oso pausu polita da diagnostikoarena. Emaitza jasotzean, Iruraren beharrak zein diren ikusiko dugu. Emakumearen aldeko edozein programa martxan jartzeko lehenengo pausua da. Ondoren, jarraitu beharreko bideak zeintzuk diren aztertu beharko ditugu.

Herriko gizon eta emakumeen errealitatearen ezagutza sakona jasoko dute

Aurreko legealdiko udal taldeak diagnostikoa egin ahal izateko diru laguntza eskatu zuen. Oraingo taldeari ezin hobeto etorri zaio laguntza hau mahai gainean izatea. Hurrengo sei hilabeteetako lana Farapik egingo du.
Lehen fasean dokumentazio lana egingo dute. Emakume eta gizonen arteko lana nola dagoen jorratuta aztertuko dute, esparru guztietan. Udaletxe barruan eta baita herrian ere. Kanpoko eragileen datuak ere jasoko dituzte. Kultur eta kirol elkarteak, osasun zentroa, ikastola, jubilatuak, gazteak, guraso elkartea,… alor guztiak ukituko dituzte.
Gero herritarrekin elkarrizketak egingo dituzte. Bederatzi elkarrizketa dituzte adostuta. Horietako bat, bazterkeria jasan duena izango da. Aldi berean bi eztabaida talde sortuko dituzte: bat elkarrizketatuekin izango da, eta bestea udaletxe barruko kideekin egingo dute.
Diagnostikoaren hirugarren zatian, bildu dituzten datuak emango dituzte, eta aurkezpen publikoa ere egingo dute. Diagnostikoak Irurako egoeraren argazkia emango die.
Ondoren erabaki egin beharko dute planarekin jarraitu edo proiektu batzuk martxan jarri.

Irurako jaietan herri bazkaria eta haur parkea

Anoetaldeko Hitza — Sat, 01 Oct 2011 15:10:40 +0000

Iruran herriko jaiak ospatzen ari dira. Gaur, besteak beste, herri bazkaria eta haur parkea eduki dituzte. Helduak zikiroa jaten ari ziren bitartean, haurrak puzgarrietan eta beste hainbat jokotan ibili dira (argazkietan ikusten den bezala).

Iruran jaiekin jarraitzen dute

Anoetaldeko Hitza — Fri, 30 Sep 2011 11:16:44 +0000

Irurako San Migel Jaiak 2011

Irailak 30, ostirala
17:00. Kale antzerkia: Irrien Lagunekin Kanta eta Dantza.
19:00. Kalejira buruhandi eta erraldoiekin eta Loatzo Musika Eskolako txistulariekin.
Ondoren. Txistor-jatea Share elkartean.
22:30. Play Back jaialdia egingo dute.
00:00. Dantzaldia Egan taldearekin plazan. Dj Bull Gazte Asanbladaren karpan.

Urriak 1, larunbata
Elkartasun eguna
11:00. Molto grand-prix karrerak Etxezarreta kalean. Oharra: parte-hartzaile bakoitzak bere motoa ekarri behar du, eta kaskoa derrigorrezkoa.
11:00. Haur parkea eta puzgarriak egongo dira, Loatzo plazan.
13:30. Dantza-soka.
14:30. Herri bazkaria.
15:00. Haur-parkea eta puzgarriak Loatzo Plazan.
18:00. Poteoa egingo dute, eta Jainekin txarangarekin girotua izango da.
23:00. Kontzertua Atila y los Unos taldearekin.
00:00. Herensugearen erretzea.
Ondoren. Laket taldea.
Oharra: Karroza festa egingo dute Gazte Asanbladaren karpan, binilotako musikarekin girotuta.

Urriak 9, igandea
Jubilatu eta pentsiodunen eguna
12:30. Meza nagusia.
14:30. Jubilatu eta pentsiodunen bazkaria egingo dute Zaharren Biltokian.
Ondoren. Jokoetako sarien banaketa, eta musika dantzagarria edukiko dute zuzenean.

Emakumearen ahotsarekin eta danbor soinuekin hasi dira Irurako jaiak

Anoetaldeko Hitza — Fri, 23 Sep 2011 18:11:08 +0000

Irura jai giroan sartu da. 18:30ean eman diote hasiera San Migel Jaiei. Emakumea izan da nagusi udaletxeko balkoian, eta guztien ordezkari izan Teo euskaldun berriak irakurri du mezua.

Jarraian suzirien eztanda hotsak etorri dira bata bestearen atzetik, eta herensugeari balkoirako bidea ireki diote. Nola ez, gozokien festa ere izan da haurren artean.

Ondoren, lau urteko haurretatik hasi eta helduak bitarte, 165 bat lagun elkartu dira danborra joaz herriko kaleak alaitzeko. Loatzoko txaranga izan dute bidean lagun.

Asteburua ekitaldiz betea dator, eta hurrengo astean ere ez dute jai girorik faltako.

Bihar, larunbata
Haur eta gazteen eguna

10:45. Umeentzako arrantzaleen jokoak, Kulki taldearen eskutik.
13:00. Neska-mutilen dantza-soka.
14:00. Haurren bazkaria.
14:30. Gazte Festakoen bazkaria.
15:00. Eskulanak haurrentzat.
16:00. Jokoak haurrentzat.
17:00. Zezen mekanikoa gazteentzat.
19:00. Sagardo dastaketa.
21:00. Gazte Festako afaria Zaharren Biltokiko jatetxean.
23:30.Kontzertua izango da Redveil, EH Sukarra eta Esne Beltza taldeekin.

Etzi, igandea
10:30. Txu-txu trena eta puzgarriak egongo dira San Migel plazan.
12:30. Apar-festa .
17:30. Triathlon inddor taldeka, Irura vs Anoeta.
19:00. Bertso-saioa: Lizaso, Lujanbio, Arzallus eta Unai Agirre bertsolariekin. Gai jartzailea , Aitor Mendiluze.
20:00. Erromeria Ingo al deu taldearekin.