Anoetaldeko Hitza » Hernialde

Bi asto Joakin Garmendiaren idi parearen aurka, etzi

Anoetaldeko Hitza — Thu, 10 Nov 2011 11:18:04 +0000

Anoetako Joakin Garmendiaren idiek apustua jokatuko dute etzi, hilaren 11n, Hernialdeko plazan. 22:00etatik aurrera, idi pareak bi astoren aurkako dema jokatuko dute. Astoak Eneko Sein pasaitarrak ekarriko ditu. Alde bakoitzak, 1500 euro jarriko ditu mahai gainean.
Ordu erdiko lanean, zeinek plaza gehiago egin; horixe da apustua. Euskal astoek 450 kiloko harria eraman beharko dute, eta 750 kilokoa Garmendiaren idiek.
Larunbatean Hernialdean txerria hiltzen dute, eta ondoren bazkaria egingo dute. Apustua jai giro honetan kokatu dute parte hartzaileek.
Sarrera doan
Hernialdeko plazara nahi duen orok joateko aukera izango du, sarrerak doan baitira. Hala eta guztiz ere, euro baten truke, saski baten zozketarako txartela eskuratuko dute hara biltzen direnek.
Hernialdeko jaietan sortu zen desafioaren ideia, abuztuan, halakoak sortu ohi diren legez: mahaiaren bueltan eta ordu txikitan. Seinek bota zuen desafioa, eta Garmendiak onartu. Orain, plazan ikustea falta da.

Orain arteko partaidetza handiena Hernialdeko 11. Rolleski Igoeran

Anoetaldeko Hitza — Sat, 22 Oct 2011 17:03:13 +0000

Hernialdeko 11. Rolleski Igoeran 75 parte hartzaile izan dira, orain arteko partaidetza handiena. Gipuzkoako, Nafarroako eta Espainiako kirolariak aritu dira lehian. Alpino Uzturre elkarteak antolatu du, eta ikusten ere jende asko zegoela esan dute. Bi erara parte hartu dute kirolariek. Skate edo patinatzaile eran, Josu Erkizia donostiarrak eta Lourdes Irazusta tolosarrak irabazi dute. Era klasikoan, Oier Goñi eta Henar Etxeberria nafarrek irabazi dute. Infantil mailan ere lehiatu dira, eta irabazleak Manu Elorza donostiarra eta Ane Gorostegi tolosarra izan dira.

«Plan orokorra bukatzea da gure helburua»

eneritz maiz — Tue, 14 Jun 2011 11:34:44 +0000

Igaro Balda, Hernialdeko alkatea

Igaro Balda izango da beste lau urtez Hernialdeko alkatea. Alkatetza hartu bezain laster hartu gaitu bere bulegoan, pasatakoaz eta hurrengo lau urteez hitz egiteko. Bihar egingo dute udal taldeko kide berriekin bilera, udalaren funtzionamendua ezagutu dezaten. Erreleboa inork hartu nahi ez duelako dagoela Udalean azpimarratu du, hala ere, talde berria osatu dute lanerako.

Lau urte pasa ostean, berriz errepikatu duzu.
Batik bat erreleborik ez dagoelako nago. Lau urteetan gustura egon naiz baina, nahiagoko nukeen utzi. Ez dago erreleborik kasu honetan eta talde berria osatu dugu. Bik jarraitzen dugu, eta bost berri sartu dira taldera. Kosta zitzaigun taldea osatzea.
Nolako esperientzia izan da aurreko legealdikoa?
Gogorra oso. Lehenengo urtea oso oso gaizki edo gogorra egin zitzaidan. Udala lau urte inor egon gabe egonda hartu genuen. Lan asko zegoen atzeratuta, eta sartu ginen zazpiak ez geneukan inolako esperientziarik. Baina behin hori pasata gustura, esperientzia ona izan da.
Orain legealdi honi aurre egiteko prest egongo zara?
Arazoa besterik ez da izango baina, errazago bai. Lau urteko esperientzia izanda errazagoa bai.

Zein balorazio egin duzue aurreko legealdiarena?
Balorazio positibo egiten dugu. Gauza mordo bat egin dira, eta diru laguntza asko lortu ditugu. Ustez jendea ere gustura geratu da.
Zein izan da herritarren erantzuna?
Denetarik. Denen gustura egitea ezinezkoa da. Orokorrean esango nuke nahiko ondo joan dela.

Hurrengo lau urteei begira, zein izango da zuen lan ildo nagusia?
Plan orokorra geratu zaigu egiteke. Zirriborro bat baino ez dugu, eta hori bukatzea izango da gure helburua. 1997. urtekoak ditugu. Hasierako onarpena eman baino lehen, herritarren ekarpenak jaso nahi ditugu. Eta hortik aurrera diruaren arabera izango da. Genituen zor guztiak kenduak ditugu, eta alde horretatik egoera onean gaudela esango dugu.
Kezkarik bai?
Abiadura Handiko Trenaren obrak. Gure lurretara iritsi dira, eta ez dugu inongo informazio ofizialik. Izugarrizko txikitzeak egiten hasi dira. Zurrumurruak baino ez ditugu herrian zabortegi bat egin behar ote duten edo. Beldur handia daukat AHTrekin.

AHTren aurkako ekintzaileek zundaketa lanak oztopatu dituzte laginak kenduz

Anoetaldeko Hitza — Wed, 08 Jun 2011 13:39:11 +0000

Azken egunetan Abiadura Handiko Trenaren proiektuarekin lotutako zundaketa lanak burutzen ari dira Hernialde eta Anoeta arteko lurretan. Abiadura Handiko Trenaren Aurkako ekintzaile talde batek, hilaren 6an, astelehenean, zundaketetan ateratako laginak gordeta zeuden kaxak ireki egin zituen. Eta ekintzaileek azaldu dute: «Bertan gordetako lurrak berriro lurrari bueltatu genizkion. Hori baita bere lekua! Horrela proiektua aurrera eramateko beharrezkoak dituzten datuak, eta egunetako lana pikutara botaz» azpimarratu dute.
Hernialde eta Anoetako herritarrak AHTren aurkako jarrera argia azaldu dute askotan. Anoetan, herri galdeketa baten bidez herritarrei iritzia emateko aukera eman zitzaienean; herritarren iritzia AHTren aurkakoa zela argi geratu zen. AHTren bultzatzaileak Hernialdera joan direnean ere erantzun garbia eman diete bertako herritarrek, proiektu honen aurka azalduz.

Hala ere herritarren hitza eta erabakiaren gainetik, proiektu hau inposatzen jarraitzen dutela diote proiektuaren aurkakoek. «Euskal Herriak behar duen garraio azpiegituraren inguruko eztabaida zabaldu beharrean, proiektu txikitzaile hau inposatzen dute». Era berean, galdera sorta luzatzen dute: «Euskal Herritarrok zer pentsatzen dugu proiektu honen inguruan? Zergatik ez zaigu iritzia galdetzen? Krisi egoera honetan, bere kostua ikusita AHT lehentasuna al da? Herritarrok ez al ditugu beste behar urgenteago batzuk? AHT kostako den dirutza ezin al genezake herritarren benetako arazoak konpontzeko erabili? Diru guzti horrekin herritarren onurarako diren politika sozialak ezin al dira hobetu?».
Galdera guzti hauek zintzilik daudela gogorarazi dute, eta beraien erantzuna garbia dela: «inposaketa». Herritarrei deia luzatu diete AHTren aurkako borrokan jarrera aktibo bat izateko. «Denon laguntza eta indarra beharrezkoa» da diote. Horregatik, deia luzatzen dute larunbatean, ekainak 11, Arrasaten burutuko den manifestaziora joateko.

20:00ak arte bozkatu dezakete Anoetaldeko herritarrek

Anoetaldeko Hitza — Sun, 22 May 2011 07:00:10 +0000

Anoetaldeko Alkizako, Anoetako, Hernialdeko eta Irurako herritarrek udal eta foru hauteskundeentzako bozka eman dezakete jada. 20:00ak arte egongo dira hauteslekuak zabalik.

Hauek dira herri bakoitzean aurkezten diren alderdiak:

Alkiza: PP eta Alkizako Abertzale Ezkertiarrak.

Anoeta: PP, PSE-EE, EAJ eta Bildu.

Hernialde: PP, eta Hernialdeko Herritarrak.

Irura: PP, PSE-EE, Bildu eta EAJ.

Hernialden desjabetze aktak sinatu gabe geratu dira

Anoetaldeko Hitza — Thu, 03 Feb 2011 18:13:01 +0000

Abiadura Handiko Trenaren Tolosa-Hernialde zatiari dagokionean, zundaketa lanak egin ahal izateko desjabetze aktak sinatzen ari dira. Hernialden ordea, udal ordezkariak udaletxeko ateak itxi zituzten eta ezin izan zuten sinatzerik egin. Udaletxe barruan eta kanpoan izan ziren AHTaren aurkakoak protesta egiten.

Lau urteko etenaldia eta gero, oraingo Udalak herriari itxura berria eman dio

Anoetaldeko Hitza — Wed, 01 Dec 2010 17:14:54 +0000

Hernialdeko Udal ordezkariek, larunbatean inauguratu zituzten Landagipuzkoa 32 programaren bidez egindako lanak. Bertan izan ziren Rafael Uribarren, Landa Ingurunearen Garapeneko diputatua eta Florentino Ugalde, Etorlurreko gerentea ere.

Aurreko legealdian, herria egoera berezian egon zen. Ez zen udal ordezkaririk egon eta ez zen ia inbertsiorik egin. Aurten aldiz, plaza, frontoia eta Maiotz eta Olatzabarrena baserrien arteko bidea egokitu dituzte.
1997. urteko proiektua zen plaza berritzearena. «Lehen fasea egin zuten baina bigarren zatia egiterako, udala ordezkaririk gabe geratu zen. 2007. urtean sartu ginenean, berriro heldu genion proiektuari. Eta diru laguntzaren bat ateraz gero, bertara aurkeztu ahal izateko proiektua prest geneukan » gaineratu du Baldak.
Honekin batera, frontoia ere zaharkitua zegoela gogoratzen du. «Ia 24 urte zeramatzan obrarik egin gabe. Ituteak eta frontisa zulatuta zituen. Egoera txarrean zegoen». Eta baserri bide bat ere konpontzeko eskaera egin zuten Foru Aldundian.
Laguntza handiak jaso dituztela dio Igaro Baldak «plaza eta frontoia egiteko diru laguntzak %90ekoak izan dira. Eta bidea egiteko %80ko laguntza jaso dugu».

Aurreko legealdian udala egoera berezian egoteak eta ia inbertsiorik ez egiteak, diru poltsa bat edukitzea ekarri du. «Poltsa hori zegoela aprobetxatuz, falta diren zatiak ordaintzeko erabili dugu».
Plaza berritzeko egin den inbertsioa, 160.000 eurokoa izan da eta udalak 140.000 euro jaso ditu. Frontoiko inbertsioa, 140.000 euroko izan da eta horietatik 20.000 euro udalak jarri behar izan ditu. Eta bidea egiteko, 266.000 euro gastatu dituzte eta Foru Aldundiak, 212.000 euro jarri ditu.
Plaza berritzearekin, aparkatzeko lekua gutxitu da eta herritarrak kexatu dira. «Baina, udaletxe azpiko lurretan ere aparkalekuak egokitu ditugu». Frontoia, urdin kolorez margotu dute. «Aian ikusi genuen eta gustatu egin zitzaigun» dio.
Bestalde, hauez gain, kirol askotarako pista egingo dute frontoiaren atzean. 101.000 euroko inbertsioa egingo dute eta 50.000 euroko laguntza jaso dute. Guztia dela eta, Hernialdeko Udalak zuen «diru poltsa amaitu dela» azpimarratzen du alkateak.

Plaza, frontoia eta bidea inauguratu dituzte Hernialden

Anoetaldeko Hitza — Mon, 29 Nov 2010 18:14:17 +0000

Hernialdeko Santa Kruz Plaza, Ernio-Bide frontoia eta Maioz-Olatzabarrena baserrien arteko bidearen inaugurazio ekitaldia izan zen larunbatean. Igaro Balda alkatea, Florentino Ugalde, Etorlurreko gerentea eta Rafael Uribarren, Landa Ingurunearen Garapeneko diputatua izan ziren, hainbat herritarrekin batera. Urte honetan egindako lanak izan dira hauek. Eta agurra dantzatu eta hitz batzuk egin ostean, mokadutxo bat egin zuten.