Anoetaldeko Hitza » Alkiza

Murrizketak direla eta, Alkizako Herri eskolako irakasleek elkarretaratzea egin dute

Anoetaldeko Hitza — Tue, 31 Jan 2012 10:25:48 +0000

Alkizako Herri eskolako irakasleak, protestan

Alkizako Herri eskolako irakasleek gaur goizean elkarretaratzea egin dute 09:00etatik 09:15etara.

“Zerbitzu publikoak garatu, murrizketarik ez” lelopean, eskolaren aurrean egon dira.

Datorren astearterako ere, hilak 7, 15 minutuko kontzentrazioa deitu dute, eta hilaren 9rako, berriz, 4 orduko geldialdia.

Familia giroan ireki dute herri ostatua

Tolosaldeko eta Leitzaldeko Hitza — Thu, 19 Jan 2012 08:37:14 +0000

Alkizako herri ostatua urtarrilaren 9an ireki zuten Oskar Abadek eta Sonia Roscok. Senar-emazte euskaldunak, sukalde lanetarako urrutira joan beharrik ez dute izan, euren bi amen babesa aurkitu baitute. Familia giroan zabaldu dute, beraz, Alkizan une honetan irekita dagoen taberna eta jatetxe bakarra.
Hernaniko bikotea gustura dago Alkizan, eta poliki-poliki joan nahi baldin badute ere, ideia ugari dituzte buruan. Alde batetik, herriari ostatu baten berezko zerbitzua eman nahi diote, eta bestetik, aisialdirako hainbat ekitaldi antolatu nahi dituzte.
Asteko zazpi egunetan zabalduko dute herri ostatua, 08:00etatik itxi arte. Orain 09:00ak inguruan zabaltzen dute, baina Alkizako etxea prest dutenean, ordubete lehenago zabaltzeko asmoa dute. Ehiza garaian, irekiera ordua, 06:00etan jarriko dutela diote, ehiztariek gosaltzeko aukera izan dezaten. Astean zehar, asteko menua egongo da, kafea barne, 9,5 eurotan. Asteburuko menuan, besteak beste, babarrunak eta ukondoa jarri nahi dutela diote. Aurrez ordua hartu nahi duenak, 943 69 18 36 telefono zenbakira deitzea nahikoa izango du. Egunean bertan joaten denarentzat ere, bazkaltzeko edo afaltzeko aukerarik ez da faltako.
Ostatua eta bere jabe berriak ezagutzeko modurik onena, hala ere, udaletxera joatea da. Eraikuntzaren azpian baitago herri ostatua.
Ideia ugari
Alkizako ostatuan zegoen aurreko maizterrak lanpostua uzteko asmoa zuela jakitean, udalak lehiaketara atera zuen herri tabernaren eta jatetxearen kudeaketa. Lanpostuekin batera, egoitza berean dagoen etxebizitzan bizitzeko aukera sartzen zen. Alkizan bizi den lagun baten bitartez jakin zuten lehiaketaren berri Oskar Abadek eta Sonia Roscok: «Zerrendan izena inork ez zuela eman esan zigun, eta guk aurrera egitea erabaki genuen. Lehen ere ostalaritza munduan ibiliak gara, baina beti beste batentzat lanean, eta ez da gauza bera», dio Abadek. Euren aldetik jatetxe bat zabaltzeko saiakerak egin zituztela ere onartzen du hernaniarrak, «baina azkenean aukera honekin topatu ginen, eta udalak eskatzen zuen alokairua merkea zenez, aurrera egitea erabaki genuen».
Zazpi hilabeteko haurdunaldian dagoen Sonia Roscoren esanetan, loteria tokatzea bezala izan da: «Biok langabezian aurkitzen ginen, eta orain, gutxienez bost urterako lana daukagu. Etxebizitza ere hor sartzen da, eta nahiz eta oraindik prest ez dagoen, espero dugu ahalik eta azkarren egotea». Bertan bizitzen jartzeko irrikaz dago bikotea, lanetik etxera eta etxetik lanerako bide horrekin amaitzeko: «Lana amaitzean Hernanira joaten gara orain. Bidean ordubete galtzen dugu gutxienez. Hemen bizitzen jartzen garenean, 08:00etan irekitzeko aukera izango dugu, eta lana amaitu eta ordu erdira ohean egon gaitezke».
Taberna urtarrilaren 9an ireki baldin bazuten ere, jatetxea astelehen honetan zabaldu dute. «Zerotik hastea» tokatu zaiela diote, eta oraindik ez dakite ongi zein harrera izango duen ostatuak. Hala eta guztiz ere, gustura daude orain artekoarekin: «Igandean jende ugari etorri zen hamaiketakoa egitera, eta ez genuen horrenbeste espero. Salda behintzat bazegoen eta moldatu ginela uste dut. Hala eta guztiz ere, hurrengorako hobeto prestatuko gara», dio Roscok.
Zerotik hastea tokatu zaie, eta ideia ugari dituzten arren, inbertsio handiegirik ezin dutela egin argi dute: «Denborarekin apaintze lanetan hasiko gara, baina poliki-poliki».
Egin nahi dituzte gauzen artean, herritarrei zuzendurikoak ere badaude, aisialdiarekin lotuta. Sonia Roscok azaltzen du zeintzuk diren: «Gazteentzat dardo makina jarri nahi dugu ostatuan. Horrela, ostiraletan eta larunbatetan txapelketak egingo genituzke; mus txapelketak ere antolatu nahi ditugu. Helduagoei, berriz, igandetan dantza egiteko aukera eskaini nahiko genieke». Horretako leku aldetik jangela egokia dute, izan ere, bertan 100 lagunentzat bazkaltzeko eta afaltzeko aukera dago.
Herriko jaiekin lotura duen ekimen bat ere martxan jarri nahi dute ostatuko maizter berriek. Roscoren esanetan, musika emanaldiak antolatu nahi dituzte jatetxean: «Hauek etorkizuneko talentuenak izango lirateke, eta bideoz grabatuko genituzke, ondoren sarean zintzilikatzeko. Herritarrek gustuko dutenak jaietan egoteko aukera izango luke. Honen inguruan udalarekin hizketan aritu gara, eta gustuko dutela esan digute. Hala eta guztiz ere, lehen esan bezala, poliki-poliki joan nahiko genuke ideia guzti hauekin».

Alkizako Ostatuak ilusioz gainezka dauden nagusi berriak ditu

Tolosaldeko eta Leitzaldeko Hitza — Wed, 18 Jan 2012 10:53:09 +0000

Oskar Abadek eta Sonia Roscok hartu dute Alkizako Herri Ostatua. Udalak lehiaketara atera zuenean, bikote hernaniarra aurkeztu zen bertara. Ostatua eta etxebizitza euren esku gelditu ziren, gutxienez bost urterako.

Urtarrilaren 9an zabaldu zuten Ostatua, eta ilusio izugarria dutela azaldu dute. Herriari taberna edo jatetxearen zerbitzua emateaz gain, aisiarako hainbat proiektu dituztela azaldu dute.

Kepa Fernandez Larrinoak liburu berria argitaratu du

Anoetaldeko Hitza — Mon, 09 Jan 2012 23:30:48 +0000

Kepa Fernandez Larrinoa antropologo eta idazleak, Manifiesto por una antropologia razonada liburu berria argitaratu du. Alkizan bizi den bilbotarrak, norberekoitasuna eta gaur egungo gizartearen kontsumismoa jorratu ditu. Antropologian zentratzen da, eta estatu neoliberal batean jokatzen duen papera aztertzen du.
Era berean, Fernandez Larrinoak, tokiko kultur garapenaren eta Europako ondare kulturalaren kritika egiten du egiten du liburuan. Unibertsitateak pribatizatzen ari direla dio, eta «enpresak unibertsitatean gero eta gehiago daude sartuta». Unibertsitateak, ikertzeko eta kulturak aberasteko izan behar dutela azpimarratu du, eta «ez etekinak ateratzeko».
Nafarroako Unibertsitate Publikoan egiten du lan, baina momentu honetan, Oxforden (Ingalaterra) bizi da, eta bertan ari da lanean. Beste bi liburu prestatzen ari da.

Alkizan pilota eta patinaje ikastaroak hastear daude

Tolosaldeko eta Leitzaldeko Hitza — Thu, 05 Jan 2012 11:40:56 +0000

Alkizako Udalak patinaje eta pilota ikastaroak antolatu ditu, eta hurrengo astean hasiko direla azaldu dute: «Atzerapenak atzerapen, patinajea hilaren 9an hasiko da, eta bestetik, frontoia berritua dagoenez, pilota hilaren 13an». Ikastaro bakoitzaren matrikula 10 eurokoa da, eta informazio gehiago udaletxean aurki daiteke.
Patinaje linealaren ikastaroa astelehenean hasi eta otsailaren 13an amaituko da. 5 eta 6 urtekoen ordutegia, 16:30etik 17:30era izango da, eta 6 urtetik gorakoena, 17:30etik 18:30erakoa. Uxue Etxebestek emango ditu klaseak eta kaskoa beharrezkoa izango da. «Ikastaroaren helburua oinarrizko maniobrak ikastea, era ezberdinetan frenatzen ikastea, giroak egitea, atzeraka ibiltzea, hainbat jolas irristaketa linealaren bidez egitea… dira», udaletik azaldu dutenez. Ikastaro amaieran, eguraldiak lagunduko balu, Asteasuko bide gorrian paseo bat emateko asmoa dute, hori bai, gurasoen laguntzarekin eta txokolatada baten laguntzaz.
Pilota ikastaroaren kasuan, lehengo urtean bezala antolatzea erabaki dute. Aitor Sorarrain irakasleak ostiraletan eskainiko ditu klaseak.

Alkizako frontoia berriz inauguratu dute

Anoetaldeko Hitza — Sat, 17 Dec 2011 19:37:45 +0000

Alkizako herritarrek auzolanean berritu dute herriko pilotalekua. Azken urteetan zahartua zegoen, eta herritarrek beraiek eman diote berritua herriko aterpe guneari.

Gaur berriz inauguratu dute. Frontoia estreinatzen lehenak txikienak izan dira. Pilota partidak jokatu dituzte, benjaminek eta gazteek.

Alkatearen agurraren aurretik, aurreskua dantzatuko dute.

Jarraian, jaietako beteranoen finalaren errebantxa jokatu dute. Bi botilero bereziren laguntza izan dute pilotariek: Anjel Mari Peñagarikano eta Iker Zubeldia bertsolariena.

Amaiera emateko txokolatada egon da.

Frontoia bihar berrinauguratuko dute

Tolosaldeko eta Leitzaldeko Hitza — Fri, 16 Dec 2011 05:57:19 +0000

Frontoiaren berrinaugurazio ekitaldia bihar egingo dute Alkizan, 16:30etik aurrera. Lehenik pilota partidak jokatuko dituzte, benjaminek eta gazteek. Alkatearen agurraren aurretik, herriko neskek aurreskua dantzatuko dute. Jarraian, jaietako beteranoen finalaren errebantxa jokatuko dute. Bi botilero bereziren laguntza izango dute pilotariek: Anjel Mari Peñagarikano eta Iker Zubeldia bertsolariena. Ekitaldiari amaiera emateko txokolatada egongo da.

Frontoia berritzeko auzolanari ekin diote

Anoetaldeko Hitza — Sat, 26 Nov 2011 16:11:28 +0000

Alkizako frontoia berritzearen bigarren zatia auzolanean burutzen ari dira. Gaurkoan, zehazki, frontoiaren kanpoko aldea txukundu dute, eta harmailak berritzen aritu dira. Lanak amaitu ondoren, hamaiketakoa egin dute. 20 herritar inguru izan dira lanean. Udaletik azaldu dutenez, beste asteburu batzuetan ere arituko dira obrak egiten auzolanean. Esaterako, egurrezko eserlekuak jarriko dituzte.

Auzolanerako deia luzatu die udalak herritarrei

Anoetaldeko Hitza — Thu, 24 Nov 2011 11:24:11 +0000

Udalak auzolana antolatu du herriko frontoian. Helburu horrekin, herritar guztiei deialdia luzatu die, etzi, hilaren 26an, frontoia txukuntzera agertzeko. Auzolanean eserlekuak eta atzealdea konpondu nahi dute. Hitzordua 09:30etan jarri dute, eta herritar guztiak gonbidatu nahi izan dituzte auzolanera.

Alkizako Udalak Herri Ostatuaren kudeaketa lehiaketara atera du

Anoetaldeko Hitza — Wed, 26 Oct 2011 11:32:50 +0000

Alkizako Udalak, Herri Ostatuaren kudeaketa lehiaketara atera du. Interesatuek beraien proiektuak aurkezteko azken eguna azaroaren 8a, asteartea, izango dute.

Kudeaketarako pleguak urriaren 11ean argitaratu ziren. Informazioa udaletxean bertan eskuratu daitezke, edo 943 69 02 35 telefono zenbakira deituz. www.alkiza.net webgunean ere zintzilikatuta jarri diztuzte.

Bertan zehazten dira ustiapena aurrera eraman ahal izateko beharrezkoak diren oinarriak, eta beharrezkoak diren datuak zeintzuk diren ere